Вход на сайт

Өрөспүүбүлүкэтээҕи оскуолаҕа киириэн иннинээҕи саастаах оҕолор иитээччилэрин "Куолу-2022" күрэһин түмүгэ

Кулун тутар 2 күнүгэр Таатта улууһугар Олоҥхо күнэ. Бу күн Куолу араатардар күрэстэрин 1996 с тэрийбит, ытыктыыр киһибит, РФ уопсай үөрэхтээһинин бочуоттаах үлэһитэ, РФ Президенин гранын хаһаайына,Таатта улууһун сайдыытыгар кылаатын иһин бэлиэ хаһаайына, СӨ үөрэҕириитин туйгуна, Игидэй нэһилиэгин бочуоттаах олохтооҕо, учууталбыт Анна Павловна Варламова төрөөбүт күнүгэр Игидэй нэһилиэгэр Өрөспүүбүлүкэтээҕи Куолу-2022 күрэс ыытылынна.
Күрэс оҕолорго, улахан дьоҥҥо, уһуйаан иитээччилэригэр анаан , тус туһунан бөлөҕүнэн барда.
Олохтоох уһуйаан иитээччитэ Аргунова Мария Ивановна уһуйаан иитээччилэригэр анаммыт Куолу күрэҕи иилээн-саҕалаан ыытта. Иитээччилэргэ анаммыт күрэс быйыл 5 сылын ыытыллар. Манна барыта 8 уһуйаантан кытыннылар.


Дьүүллүүр сүбэ састаабыгар үлэлээтилэр:
Аргунова Лидия Петровна- И.А.Аргунов аатынан Тааттатааҕы кииннэммит библиотека сүрүн библиотекэрэ, Жулева Александра Семеновна- СӨ “Иэйии” КСТ, “Уран тыл”, “Сайар Сарыал”, “Дорҕоон тойуга” литературнай түмсүүлэр кыттыылааҕа, «Куолу -2021” сыл улахан дьоҥҥо күрэһин муҥутуур кыайыылааҕа, Марков Николай Эдуардович- Хотугулуу- Илиҥҥи Федеральнай Университет, физико-техническай институт 3 кууруһун устудьуона.
Күрэх үс түһүмэҕинэн барда. Ол курдук бастаан , эрдэ устан , оҥорон , кыттааччылар өс-хоһоонугар олоҕуран айбыт остуоруйаларын кэпсээһин, иккиһинэн сомоҕо-номохтор суолталарын быһаарыы, үсүһүнэн эргэрбит тыллары билии. Кыттааччылар бары даҕаны бастакы түһүмэххэ олус бэлэмнэммиттэрэ, иитээччилэр хомоҕойдук, уус-уран тылларынан айбыт остуоруйаларын бары даҕаны олус сөбүлээн иһиттибит. Манна оҕо болҕомтотун тардар гына, аныгы технология көмөтүнэн туһанан мультик оҥорон киэргэтэн биэрбиттэрэ, анал остуоруйаҕа кэпсэнэр геройдары тигэн туһаммыттара кэрэхсэннэ. Бу түһүмэххэ кыттааччы остуоруйатын уустаан ураннаан суруйуута, өс хоһоону сиһилии арыйыы, тылы ыраастык туттуу уонна дьон болҕомтотун төһө тардарыгар баал турда.
Иккис түһүмэххэ сомоҕо-номохтору быһаарыыга, үгүстэр ыарахаттары көрүстүлэр. Ол эрэн тобулан, толкуйдаан, ырытан бэйэлэрин санааларын, көрүүлэрин эттилэр. Үһүс түһүмэх эргэрбит тыл, ол эбэтэр билигин биһиги олохпутугар күннэтэ туттуллубат тыллар. Манна тэрийээччилэр үксүн Э.К.Пекарскай тылдьытыттан тыллары киллэрбиттэр. Онон инникитин кыттааччылар маны болҕомтоҕо ылыахтарын наада.
Олус интириэһинэй күрэс түмүгүн, дьүүллүүр сүбэ, биэстии баалынан сыаналаан, уопсай түмэн таһаарда.
Ол курдук:
Куолу-2022 с «Кылаан Чыпчаал» аатын Иванова Тамара Николаевна – Э.К.Пекарскай аатынан Игидэй орто оскуолатын, «Теремок» оҕо уһуйаанын, музыкаҕа салайааччыта ;
Бастакы үрдэл- Сорошева Дария Ивановна- Таатта улууһун “Күн туллуктара” уһуйаан иитээччитэ;
Иккис үрдэл- Ефимова Ирина Романовна – Н.Гуляев аатынан Туора-Күөл орто оскуолатын уһуйаанын иитээччитэ;
Үһүс үрдэл- Канаева Елизавета Николаевна –Чычымах орто оскуолатын уһуйаанын иитээччитэ;
«Хомоҕой тыллаах” анал ааты- Пономарева Лена Николаевна- Социалистическай үлэ геройа Т.Г.Десяткина аатынан Тумул орто оскуолатын уһуйаанын иитээччитэ.
“Тобуллаҕас толкуйдаах” анал ааты Павлова Елена Семеновна- Таатта улууһун, “Сулусчаан” уһуйаан иитээччитэ.
Бары кыттыбыт иитээччилэрбитигэр баҕарабыт өссө да үлэҕит ситиһиилээх, тахсыылаах буоларыгар. Кэлэр кэнчээри ыччаттарбыт туһугар өйгүтүн-санааҕытын ууран туран үлэлииргитигэр барҕа махтал буоллун.

Наверх